Windmills.

Een or twa lines t' George W. Bush.
(Fae ae White Hoose til' anither).

Dear George,

In Drummuir, there's a road o'er the moor
Fae the castle t' Glentaucher's 'still',
Far they wint t' bigg windmills three hunder feet high,
'n' wi' profits t' mak', surely will.

So the headlines micht read, "Drummuir sees the need
T' halt global warmin'," … bit still…
Wid it nae be mair eese gin the hale world could see
Een or twa up on Capitol Hill?

'Cause I'm bound t' get rilet fin sunsets are spilet
As yon rural skyscrapers birl roon,
But I'd manage t' thole't if we jist got a han'
Fae the land that put men on the moon.

For it's nae yet o'er late for Congress t' state
On Kyoto you've hid a rethink,
'n' t' tell the U.N. you'll now dee y'r bit
T' pull the world back fae the brink.

For while glaciers melt, effects'll be felt
By the hale o' the world, rich and poor,
So reduce greenhoose gasses 'n' save a' mankind.

Fae
Jim Bremner
The Greens
At Drummuir.

P.S. Now y' micht nae agree wi eejits like me
Gi'e'n unsocht advice bit remember,
Fit's important is savin' the world, even though
Y' get Kerry'd awa come November.