The group wis sittin' roon the fire
A' moothin' threats sae grim an' dire
An' brewin' in this divil's den
Damnation for their fellow men
For a' the watter they'd pollute
An' spread confusion in their route

They carriat oot their evil brew
O' chemicals the world wid rue
An' put it canny in their car
Tae tak' it tae the reservoir
Then drove lik' warlocks through the nicht
On backroads, keepin' oot o' sicht

At last, weel in the witchin' oor
They reach't the loch upon the moor
An' lik a wraith they drew tae rest
The country tae defile, infest
An' then lik' ghosts they sallied oot
An' a' wis silent roon aboot

They crept alang the watters edge
An' set their potion on a ledge
An' then aneth that feeble moon
This group o' ootcasts gaithert roon
The leader said "Let's dae the deed
This nicht will set them on their heid"

Wi' actions that wid chill the bleed
They set aboot their evil deed
Wi' mony lauchs an' whiles a curse
They strove tae mak' the world worse
An' as the potion gurgl't oot
Did ony o' them feel a doot?

Wi' mission dean they crept awa'
Noo fearfu' o' the men o' Law
Bit b' a shepherd they'd been seen
An' tae the polis he ha hid gean
Wi' stories o' suspicious men
In darken't car gaen through the glen

A week gaed by then fortune came
The polis found the hidden men
An' put them in a prison cell
Tae mak' them a' their story tell
Bit steadfastly they kept it dark
Until their brew had daen its wark

An' then the Sherrif took a hand
An' summond up the evil band
He said "Ye may be gie uncouth
Bit, dammit, I will hae the truth"
An' so the layers startit in
Tae try tae bare their every sin

The tale wis slowly ruggit oot
Bit still there wis a bit o' doot
O' jist fit kind o' nesty brew
Wis mix't b' this infernal crew
For tho' a month hid noo gaen by
The sickness rate wis nae mair high

The Sherrif wis a patient man
Bit this wis mair than he could stan'
He bellowed oot "Ye'll tell me noo
Or by the Lord this day ye'll rue
For I will see that for this strife
Ye'll be in Dartmoor a' yer life!"

The leader stepit tae the front
An' said "I'll tell ye what ye want
Ye ca' us dam't for spreadin' strifr
Bit, dammit man, we're spreadin' life
That potion wisna made tae kill
That potion coonteracts the PILL!"

A silence fell upon the place
Expressions warred on ivery face
The Sherrif thoucht "My God, the wife
The divils, this is really strife!"
The jury gaed a kinna grunt
As ivery ane absorbed the dunt

The Foreman's mistress came tae min'e
That quine wid lay it on the line!
A bobby stanin' near the door
Heard in his lugs a muckle roar
An' thocht o' a' the quines he'd meet
When oot at nicht upon the beat

The Sherrif said "We'll noo recess"
An thoucht "I'll hae tae sort this mess"
An then he gaed a weary sigh
"Abortion, it's the only wye"
So wha's the culprit, wha's made strife?
An' wha's the ane that took the life?

---------End---------------